Kanadískur fisksölurisi býður 52 milljarða í Icelandic Group

Forsvarsmenn kanadísks fisksölufyrirtækis eru afar ósáttir við að fá ekki að bjóða í Icelandic Group sem er í eigu Framtakssjóðs Íslands. Viðræður um sölu á hlut í fyrirtækinu til dansks fjárfestingasjóðs eru langt komnar.

Samkvæmt heimildum Fréttablaðsins hafa forsvarsmenn fyrirtækisins High Liner Foods ítrekað sent framkvæmdastjóra Framtakssjóðs Íslands erindi vegna málsins, nú síðast í gær.

Þar kemur fram að High Liner Foods sé tilbúið að greiða um 340 milljónir evra, sem jafngilda um 52,4 milljörðum króna, fyrir allar eigur Icelandic Group utan Íslands. Það er þó háð því að áreiðanleikakönnun á Icelandic Group leiði ekkert óvænt í ljós. High Liner Foods er helsti keppinautur Icelandic Group. Fyrirtækið vinnur og selur sjávarafurðir í verslanir um öll Bandaríkin, Kanada og í Mexíkó.

Forsvarsmenn Framtakssjóðs Íslands hafa hingað til ekki sýnt áhuga á viðræðum við High Liner Foods. Samkvæmt heimildum Fréttablaðsins eru viðræður um sölu á stórum hluta Icelandic Group til danska fjárfestingasjóðsins Triton langt komnar.

Finnbogi Jónsson, framkvæmdastjóri Framtakssjóðs Íslands, segir ekki standa til að selja meirihluta í íslenskum hluta Icelandic Group, sjálfu sölukerfinu. Þó komi vel til greina að selja meirihlutann í verksmiðjum fyrirtækisins erlendis.

„Það hafa margir haft samband eftir að við eignuðumst fyrirtækið og komið með sínar hugmyndir. Við ákváðum að taka upp viðræður við einn aðila. Tíminn mun svo leiða í ljós hver niðurstaðan verður,“ segir Finnbogi. Hann segir að á meðan rætt sé við Triton sé ekki rætt við aðra fjárfesta.

Stærstur hluti Icelandic Group komst í eigu Framtakssjóðsins þegar sjóðurinn keypti eignarhaldsfélagið Vestia af Landsbankanum í ágúst í fyrra. Framtakssjóðurinn er í eigu sextán af stærstu lífeyrissjóðum landsins. Finnbogi segir söluferlið opið í þeim skilningi að allir sem hafi áhuga á því að eignast hlut í fyrirtækinu viti að til standi að selja hluta þess og geti lýst yfir áhuga. Hann segir að Framtakssjóðurinn sé að hluta til að velja sér samstarfsaðila með sölu á hlut í fyrirtækinu.

Sala Landsbankans á Vestia til Framtakssjóðs Íslands var gagnrýnd, þar sem yfirlýst stefna Vestia var að selja fyrirtæki sem kæmust í eigu félagsins í opnu og gagnsæju ferli. Þá sagði Steinþór Pálsson, forstjóri Landsbankans, í samtali við Rúv að Framtakssjóður Íslands hefði sömu stefnu og myndi selja fyrirtækin í opnu ferli.- bj