Ekki færri íbúðir síðan í stríði

Um síðustu áramót voru aðeins 14 nýjar íbúðir í smíðum í Reykjavík, samkvæmt tölum frá byggingarfulltrúaembættinu. Byggingamarkaðurinn er í sögulegu lágmarki og virðist lítið vera að taka við sér.

Árið 2010 voru fullgerðar íbúðir í Reykjavík 309 talsins, en árið áður voru þær aðeins 112. Þær hafa ekki verið færri síðan í seinna stríði, en árið 1940 voru þær aðeins 25. Strax árið eftir voru þær orðnar 287.

Magnús Sædal, byggingafulltrúi í Reykjavík, segir byggingamarkaðinn vera í algjöru frosti. Ekkert hjá embættinu bendi til að þíða sé fram undan. „Ég sé það ekki að landið sé að rísa. Það sem af er þessu ári hefur verið mjög lítið um að vera."

Alls voru samþykktar 27 byggingarleyfisumsóknir um byggingu íbúða í Reykjavík árið 2010. Það er hrun frá því árið 2009, þegar þær voru 125 talsins. Árið 2005 voru þær 797 og hrunárið 2008 490.

Ágúst Friðgeirsson, framkvæmdastjóri ÁF húsa, segir markaðinn vera í frosti. Lítill sem enginn aðgangur sé að fjármagni og allir haldi því að sér höndum. Þá hafi markaðurinn breyst frá því fyrir hrun þannig að íbúðir séu minni núna. „Við vorum að byggja þetta 110 til 115 fermetra þriggja herbergja íbúðir fyrir hrun og allt upp í 170 til 180 fermetra í einstaka tilfellum. Þriggja herbergja íbúðir í dag eru hins vegar svona 80-90 fermetrar að stærð."

Ágúst segir mikið atvinnuleysi vera í greininni og sjálfur hefur hann þurft að fækka starfsfólki úr 70 til 80 í 5 til 10. „Auðvitað fer þetta af stað einhvern tímann. Það þarf 1.500 til 2.000 íbúðir á ári hér á landi og ef eitt ár dettur út safnast þörfin einfaldlega upp."

Alexander G. Alexandersson, framkvæmdastjóri Steypustöðvarinnar, segir að hrunið hafi skollið af fullum þunga á byggingarmarkaðinn um mitt ár 2009. Árið 2008 hafi verið metár í sölu steynsteypu og fjöldi verka ókláraður þegar hrunið skall á. „Þetta var síðan mjög dapurt í fyrra, en við gerum ráð fyrir lítils háttar aukningu í ár." Hann segir ýmsa verktaka vera að velta fyrir sér að fara af stað, en það vanti herslumuninn. „Ég vonast þó til þess að við séum að nálgast þann punkt þar sem við getum horft upp á við."

kolbeinn@frettabladid.is