Aðvörun!

Nú er ljóst að ríkistjórnin ætlar að beygja sig undir vilja LÍÚ og SA og með því tekur hún hagsmuni fárra fram yfir heildarhagsmuni. Ríkistjórnin hefur fallið frá því sem lofað var í stjórnarsáttmálanum um að breytingar yrðu gerðar á núverandi fiskveiðistjórnunarkerfi. Þess í stað verður núverandi handhöfum afhentur nýtingarrétturinn á sjávarauðlindinni í 23 ár. Hrunameistararnir Halldór Ásgrímsson og Davíð Oddsson leyfðu sér aldrei að láta nýtingarréttinn af hendi í meira en eitt ár í einu. Það ætlar hins vegar ríkisstjórnin sem setti á stofn mannréttindaráðuneyti að gera. Því það frumvarp sem nú liggur fyrir hunsar mannréttindaálit Sameinuðu þjóðanna og íslenska stjórnarskrá.



Núverandi frumvarp tryggir núverandi handhöfum kvótans nýtingarréttinn til 23 ára. Fyrir það er þeim ætlað að greiða 5 milljarða sem eru smámunir í ljósi þess að afskrifaðir voru 2,6 milljarðar af smábátaútgerð í eigu Skinneyjar-Þinganess á síðasta ári. Hækka á veiðigjald úr 6 krónum í 12 sem er langt frá markaðsverði sem oftast er hægt að sjá á vef LÍÚ. Þetta er verra en Magma-dæmið því þar var þó öllum gefinn kostur á að bjóða í nýtingarréttinn.



Boðaðar breytingar eru stærsti glæpur Íslandssögunnar og það er ekki sátt um þær. En forsenda framfara og uppbyggingar er að skapa sátt. Það þarf að koma í veg fyrir að þeir hinir sömu og áttu stóran þátt í hruninu fái áfram að mata krókinn á kostnað almennings í landinu. Útgerðarmenn boða verri lífskjör ef hróflað verður við sérhagsmunum þeirra. Bankamenn gerðu slíkt hið sama fyrir hrun. Undan þeirra kröfum var látið og við vitum öll til hvers það leiddi. 



Engin lýðræðisþjóð lætur af hendi nýtingarrétt til sérhagsmunaaðila til svo langs tíma eins og núverandi stjórnvöld ætla að gera. Þjóðin þarf á því að halda að hún fái öll notið arðsins af auðlind sinni til að komast út úr þeim vanda sem hún er nú að takast á við. Íslensk alþýða þarf að rísa upp og berja frá sér og tryggja að heildarhagsmunir verði teknir fram yfir hagsmuni fárra sem hafa það eitt að markmiði að hagnast án tillits til þess sem kemur heildinni til góða.



Pottaleiðin breytir engu þar um því núverandi handhafar aflaheimilda nota og koma til með að nýta alla pottana. Allir geta í dag fengið að veiða úr skötuselspottinum. Þeir sem þegar eiga kvóta í skötusel geta leigt frá sér veiðiheimildir fyrir 350 kr. og leigt til sín á 120 kr. frá ríkinu. Þeir sem fá línuívilnun í dag eru þeir sem eru með aflaheimildir því sá sem á ekki aflaheimildir fær ekkert. Þeir sem fá byggðarkvóta eru þeir sem eiga aflaheimildir því til að fá byggðarkvóta þarf að leggja til tonn á móti tonni. Þeir sem nýta rækjuna eru þeir sem eiga fyrir aflaheimildir í þorski og grálúðu.

Þetta eru staðreyndir málins og það er mikill misskilningur að núverandi stjórnarfrumvarp skerði á einhvern hátt hagkvæmni eða möguleika útgerðarfyrirtækja í landinu. Því er betra að gera ekkert en þessa vitleysu.