Kerti menga meira en fjölmennar umferðaræðar

Bruni frá einu stöku kerti veldur margfalt meiri mengun innanhús en er til staðar á fjölförnum umferðaræðum. Í frétt um málið í Politiken segir að samkvæmt mælingum gefur brennandi kerti frá sér nær áttfalt meira af hárfínum sótögnum en umferðin á H.C. Andersen breiðgötunni í Kaupmannahöfn.

Þetta eru slæmar fréttir fyrir Dani en yfir helmingur þeirra kveikir á kerti á hverjum degi á heimili sínu yfir vetrarmánuðina. Hið mikla magn af sótögnum sem stafa frá kertum hefur vakið áhyggjur meðal lækna og vísindamanna sem hvetja Dani til að draga úr notkun þeirra.