Eigendur Formúlu 1 liðs Lotus keyptu sportbílaframleiðanda

Team Lotus Enterprise, sem á Formúlu 1 liðið Lotus tilkynnti í morgun að fyrirtækið hafi keypt breska sportbílaframleiðandann Caterham Cars. Eigendur Team Lotus Enterprise eru Tony Fernandes, Kamarudin Maranun og SM Nasarudin, en Formúlu 1 lið Lotus hefur keppt í Formúlu 1 frá því í fyrra.

Catherham Cars er þekktur breskur sportbílaframleiðandi og framleiðir m.a. Superlight R500, sem sjónvarsþátturinn Top Gear, framleiddur af BBC valdi bíl ársins árið 2008. Fyrirtækið framleiðir sportbíla fyrir almenning, sem hafa einnig verið notaðir í kappakstursmótum gegnum tíðina.

„Caterham er staðsett á einstökum stað í hjarta bílaheimsins. Þá er það ekta breskt merki, sem er þekkt fyrir að skila sínu, góða aksturseiginleika og framúrskarandi tækni. Fyrirtækið er þegar með góða sölu í Evrópu, Japan, Ástralíu og í Mið-Austurlöndum og með leiðsögn núverandi yfirmanna, þá erum við með burði til að að víkka sjóndeildarhringinn með nýjum vörum og útbreiðslu vörumerkisins á alþjóðvettvangi", sagði Tony Fernades m.a. í tilkynningu um kaupin. Hann er yfirmaður Lotus Formúlu 1 liðsins og er frá Malasíu.