Ætla að selja Norðurlandabúum 150 Raf-Rovera

Fyrirtækið Northern Lights Energy (NLE) hefur gert samning við breskt framleiðslufyrirtæki um sölu á 150 rafbílum af gerðinni Range Rover, eða E-Range. Fyrirtækið gerði samning við Liberty Electric Cars, sem er staðsett í Oxford í Bretlandi. Samningurinn hljóðar upp á 24 milljónir punda eða um fjóra og hálfan milljarða króna.

„Flestir bílarnir verða seldir á Norðurlöndunum," segir Sighvatur Lárusson, einn af eigendum og stofnandi NLE, um samninginn. Aðspurður segist hann ekki vita hversu margir bílar verða fluttir hingað, ef einhverjir.

Ef þingsályktunartillaga iðnaðarráðherra um endurgreiðslu á virðisaukaskatti bílanna, verður að veruleika, þá mun Raf-Roverinn kosta á bilinu 25 til 30 milljónir íslenskra króna.

Að sama skapi mun kaupandinn spara gríðarlega háum fjárhæðum í eldsneytiskostnað, í það minnsta hér á landi.

Sighvatur segir bílinn lúxuskerru og gefi bensínbílnum ekkert eftir. Þannig verður hægt að aka 320 kílómetra á hleðslunni auk þess sem bíllinn verður mjög kraftmikill. Sighvatur bendir á að í Danmörku kostar bensínútgáfan af bílnum allt að 60 milljónir króna.

Bílarnir 150 verða fluttir til Norðurlandanna á næstu fjórum árum.

„Það hafa verið að seljast 50 bílar í Danmörku og Noregi á ári hverju," segir Sighvatur en þeir ætla einnig að freistast til þess að selja Færeyingum Raf-Roverana.

Sighvatur er ánægður með þá þróun sem hefur átt sér stað í rafbílavæðingu á Íslandi. Hann vill þó að það verði gefið enn meira í, ef svo má að orði komast, en í Noregi hafa stjórnvöld meðal annars tekið ákvörðun um að 200 þúsund rafbílar verði á götum Noregs árið 2020.

Hann vill sjá slíka skuldbindingu hjá íslenskum stjórnvöldum, en er þó sáttur við þau skref sem þegar hafa verið tekin, og vilyrði eru um að taka.