Eignastýring Íslandsbanka breytist í VÍB í dag

Eignastýring Íslandsbanka mun í dag taka formlega upp nafnið VÍB sem er sama nafn og eignastýringarfyrirtæki Íslandsbanka starfaði undir á árunum 1986-2001.

Í tilkynningu segir að VÍB verður áfram hluti Íslandsbanka en breytingin felur þó í sér skýrari aðgreiningu milli bankastarfsemi og eignastýringarþjónustu. Undir VÍB mun vera starfrækt alhliða eigna og verðbréfaþjónusta með áherslu á fagmennsku og fræðslu.

VÍB mun leggja mikla áherslu á fræðslu fyrir fjárfesta og sparifjáreigendur og verða reglulegir fræðslufundir haldnir í höfuðstöðvum Íslandsbanka á Kirkjusandi sem og víðsvegar um landið.

Á nýjum vef VÍB, www.vib.is verða fréttir, fræðsla og upplýsingar um markaði og vísitölur. Þar er að finna pistla um ýmis mál tengdum markaði og fjármálum, auk lista yfir helstu hugtökin sem notuð eru í tali um fjármál og efnahagslíf. Þar gefst viðskiptavinum einnig kostur á að skoða fræðsludagskrá VÍB og skrá sig á þá fræðslufundi sem eru í boði hverju sinni.

VÍB er leiðandi á íslenskum markaði með hundruð milljarða króna í eignastýringu og vörslu fyrir tugi þúsunda viðskiptavina, allt frá einstaklingum til fagfjárfesta.

VÍB býður upp á breitt þjónustu og vöruframboð á sviði almenns sparnaðar, eignastýringar og lífeyrismála. Helstu samstarfsaðilar eru Íslandssjóðir, Vanguard Group og DNB Nor Asset Management í Noregi.