Lögmannsstofur semja við Skýrr um hýsingu og rekstur

Fjórar lögmannsstofur að Suðurlandsbraut 18 hafa samið við Skýrr um heildarlausn í hýsingu, rekstri og útvistun upplýsingatækni. Þetta eru Advel, Fulltingi, Gjaldheimtan og Momentum.

„Um er að ræða miðlæga hýsingu á öllu tölvuumhverfi og hugbúnaðarlausnum lögmannsstofanna fjögurra, þar á meðal Microsoft Dynamics NAV, DK hugbúnaði, innheimtukerfi, málaskrám og pósti,“ segir í tilkynningu frá Skýrr.

Þá segir að hýsing kerfanna verði í kerfisleiguhögun hjá Skýrr, en þannig fái starfsfólk lögmannsstofanna hnökralausan aðgang að eigin vinnuumhverfi, gögnum og hugbúnaði gegnum öruggt umhverfi, sem sé hýst, afritað og vaktað á miðlægum búnaði hjá Skýrr allan sólarhringinn.

„Við vorum að leita að traustum og öflugum hýsingaraðila og vildum á sama tíma gæta ítrustu hagkvæmni. Skýrr hefur áratugareynslu af hýsingu og kerfisleigu og uppfyllir strangar kröfur alþjóðlegra gæða- og öryggisstaðla um afköst, áreiðanleika og fagmennsku. Við höfum miklar væntingar til þessa nýja samstarfsaðila okkar og teljum að við séum þar í góðum höndum," segir Guðmundur Siemsen, meðeigandi hjá Advel.

„Þessar fjórar lögmannsstofur eru afskaplega framsæknir notendur upplýsingatækni. Þau gera miklar kröfur til samstarfsaðila sinna. Við lítum á það sem hraustlega áskorun og í raun tilhlökkunarefni að veita þeim fyrsta flokks þjónustu," segir Gestur G. Gestsson, forstjóri Skýrr.