Sturla: Úrslitaleikur fyrir bæði lið

Sturla Ásgeirsson, einn sérfræðinga Vísis um HM í handbolta, þorir varla að spá fyrir um úrslit leiksins gegn Spánverjum í dag.

„Þetta verður erfiður leikur. Ég sá hluta af leik Spánar og Frakklands og þeir spænsku voru nokkuð segir í þeim leik. Ég var búinn að afskrifa þá en þá komu þeir til baka og náðu jafntefli með ótrúlegri seiglu," sagði Sturla.

Líklegast er að Frakkland muni fara áfram í undanúrslitin og leikurinn í dag er því afar þýðingamikill. „Þetta er úrslitaleikur fyrir bæði lið en ég vona að við verðum betur stemmdir fyrir þennan leik en við vorum gegn Þýskalandi um helgina."

Ísland tapaði á laugardaginn sínum fyrsta leik á HM er strákarnir okkar mættu Þjóðverjum.

„Þetta hefur verið þvílíkt kjaftshögg fyrir strákana og ég vona að þetta hafi kveikt enn meira í mönnum. Við erum núna komnir út í horn og verðum að vinna næstu leiki. Ég held að strákarnir séu búnir að þjappa sér saman og hafi nýtt frídaginn vel. Nú er spurning hversu mikið það hefur gefið okkur."

„En ég þori varla að spá fyrir um úrslit leiksins. Ég átti alls ekki von á því að við myndum tapa fyrir Þýskalandi og ég hætti að horfa þegar það voru enn fimm mínútur eftir af leiknum. Þetta var hræðilegt - hugmyndasnautt og erfitt."

„En ég tel að við getum gengið út í spænsku skytturnar. Þeir eru frekar hægir. Við þurfum samt að loka á línumanninn þeirra sem er frábær. Við þurfum líka að ná upp góðu flæði í sóknarleiknum og hann þarf að vera miklu betri en hann var í leiknum um helgina."

Sturla bendir á að yfirleitt hafi okkur gengið vel í leikjum þar sem allt er undir. Ísland vann Danmörku á EM í Austurríki í fyrra og sömuleiðis frægan sigur á Frökkum á HM 2007.

„Ef að stemningin verður í botni hjá okkur þá vinnum við þennan leik. Við þurfum að fá frábæran varnarleik og góða markvörslu. Hornamennirnir þurfa einnig að koma vel inn í leikinn og þá fáum við mörk sem mun gefa okkur sjálfstraust."

Sturla var í liðinu sem vann til bronsverðlauna á EM í fyrra og einnig í silfurliðinu í Peking. Hann þekkir því vel til þess hvernig liðið undirbýr sig fyrir svo mikilvæga leiki.

„Núna er hver og einn að undirbúa sig á þann hátt sem hann vill. Allir fundir eru búnir og menn eru að gera það sem þeim hentar."

„Það er yfirleitt nokkuð rólegt í klefanum fyrir leik og menn að einbeita sér að leiknum. Svo í lok upphitunarinnar fara menn að berja hverja aðra áfram og rífa þetta í gang."

„Svo mun Gummi koma með sína ræðu og koma leikmönnum í rétta gírinn fyrir leikinn. Óli mun líka koma með sína punkta og það ætti að vera nóg til að kveikja í mönnum við þessar aðstæður. Svo er bara að vona það besta."