Nýherji sýndarvæðir hjá Air Atlanta

Nýherji hefur lokið við að sýndarvæða upplýsingatækniumhverfi flugfélagsins Air Atlanta. Sýndarvæðingarlausnin felur í sér lækkun á rekstrarkostnaði, svo sem í rafmagnssparnaði fyrir hátt í 2 milljónir kr. á ári. Þá er fjárbinding í vélbúnaði lægri og rými undir upplýsingatæknibúnað félagsins er mun minna en áður.

Í tilkynningu segir að Innleiðingin nær til netkerfa, netþjóna, miðlægrar gagnageymslu, öryggisþátta og sértækra kerfa í höfuðstöðvum þess á Íslandi og á útstöðvarneti þess erlendis.

“Það var komið að þeim tímapunkti í rekstri okkar að endurnýjunar var þörf á ýmsum vélbúnaði og kerfum. Við vildum einnig nota tækifærið og komast í þær aðstæður að einfalda rekstrarumhverfi okkar, auka rekstraröryggi og bæta þjónustu við notendur kerfa.

Með því að velja VMware sýndarvæðingarlausn frá Nýherja náðum við ekki bara fram sparnaði í rafmagni heldur líka minna rými undir búnaðinn. Við fækkuðum netþjónaskápum úr fimm í einn og kæliþörf varð minni. Flækjustig í rekstri minnkaði, það dró úr vélbúnaðarkaupum og uppsetning á nýjum netþjónum er framkvæmd á mun styttri tíma,” segir Gnúpur Halldórsson yfirmaður upplýsingatæknimála hjá Air Atlanta.

Air Atlanta sérhæfir sig í leiguverkefnum og á vegum þess starfa um 1.100 manns.