Anna Úrsúla: Þreyta og reynsluleysi fór með leikinn

„Lokatölurnar segja voðalega lítið um leikinn, en þessi seinni hálfleikur fór alveg með okkur,“ sagði Anna Úrsúla Guðmundsdóttir, leikmaður íslenska landsliðsins, eftir að liðið fékk úr leik á heimsmeistaramótinu í handknattleik í 16-liða úrslitum gegn Rússum.

„Við stóðum vel í þeim í fyrri hálfleik og betri en þær á köflum en það var eins og við brotnum eitthvað í seinni hálfleik".

„Það er frábært að geta miðað sig við þessar bestu þjóðir í heimi og gott að vera komin á þessu mót. Við vorum bara í raun óheppnar að lenda svona neðarlega í okkar riðli og lenda á móti þessum risa í 16-liða úrslitum".

„Þreyta og reynsluleysi fór kannski með þetta hjá okkur í síðari hálfleik. Við verðum núna að stíga næsta skref og halda áfram að bæta okkur".