Fréttaskýring: Skráning Horns markar tímamót

Tilkynnt hefur verið um það formlega að til standi að skrá Horn fjárfestingafélag á markað á næstu vikum. Skráning félagsins mun marka tímamót, þar sem um er að ræða eign sem er 100% í eigu Landsbanka Íslands, sem síðan er að 81% leyti í eigu íslenska ríkisins. Því er í reynd um að ræða einkavæðingu í þeim skilningi að eign sem er í eigu almennings verður seld til einkafjárfesta. Í þetta skiptið, ekki frekar en þegar Landsbankinn seldi dótturfélag sitt Vestia til Framtakssjóðs Íslands, eiga stjórnmálamenn enga aðkomu.

Eignarhlutir í ýmsum fyrirtækjum

Horn er ekki rekstrarfélag heldur fjárfestingafélag, eins og áður segir. Eignir félagsins eru einkum eignarhlutir í félögum, bæði skráðum og óskráðum, í ýmsum rekstri.

Í skráðum félögum á Horn 1,9% hlut í Intrum Justita sem skráð er á markað í kauphöllinni í Stokkhólmi í Svíþjóð. Auk þess á félagið 3,9% hlut í Oslo Bors VPS Group en það samanstendur af fjórum fyrirtækjum, þ.e. kauphöll, verðbréfaskráningu, uppgjörsþjónustu og markaðslausnum. Félagið býður upp á markaðstorg fyrir skráningu og viðskipti með verðbréf, skráningu á eignarhaldi og uppgjöri verðbréfa, sem og markaðsgögn og veflausnir. Félagið er í eigu Oslo Bors VPS Holding ASA og viðskipti með það fer fram á opnum tilboðsmarkaði.

Óskráðar eignir eru 3,95% hlutur í Eimskip, 13,75% hlutur í Eyri Invest, stærsta einstaka eiganda Marels, og 49,9% hlutur í Promens, sem er leiðandi á heimsvísu í framleiðslu plastafurða.

Miklar tilfæringar

Nokkrar breytingar hafa verið gerðar á stjórn Horns að undanförnu, eins og greint hefur verið frá á Vísi. Guðrún Ragnarsdóttir sagði sig úr stjórn félagsins samhliða tilnefningu hennar í stjórn Bankasýslu ríkisins og Steinþór Pálsson, bankastjóri Landsbankans, hefur einnig sagt sig úr stjórninni með það fyrir augum „að draga úr beinum tengslum Landsbankans og Horns."

Frans Páll Sigurðsson, framkvæmdastjóri Fjármála í Landsbankanum er nú eini fulltrúi bankans í stjórn Horns en fjórir eru óháðir. Það eru Ragnhildur Geirsdóttir, Guðrún Björg Birgisdóttir, Hilmar Ágústsson og Sigurbjörn Jón Gunnarsson sem gegnir stjórnarformennsku. Þá hefur Landsbankinn tilnefnt Bergþór Björgvinsson sem varamann í stjórn Horns, að því er greint hefur verið frá á vefsíðu Horns.

Undirbúningur að skráningu er langt kominn samkvæmt upplýsingum frá Kristjáni Kristjánssyni, upplýsingafulltrúa Landsbankans. Ekki liggur þó endanlega fyrir hvenær félagið verður skráð á markað.

Undirbúningur að skráningu félagsins hefur m.a. falist í tilfærslum á eignum Horns til Landsbankans til að tryggja „gott jafnvægi í eignum félagsins" eins og segir á vef Horns. Meðal þeirra eigna sem seldar hafa verið til Landsbankans að undanförnu eru 29,6% hlutur í fasteignafélaginu Reitum hf. og 13,75% hlutur í Eyri Invest ehf. sem báðar voru seldar til Landsbankans á bókfærðu virði Horns eins og það var þann 30. september síðastliðinn. Þessar tilfærslur hafa engin áhrif á afkomu Horns eða Landsbankans. Horn seldi auk þess 3,8% hlut í Össuri hf. til Landsbankans á dögunum. Ekki hefur verið upplýst um verð í þessum viðskiptum né hvort félagið verður selt allt í einu við skráningu eða að hluta.

Aðspurður sagðist Kristján ekki geta svarað því hversu lengi Landsbankinn ætlaði að halda á fyrrnefndum eignum, en bankinn myndi þó selja þær með tímanum, eftir því sem markaðsaðstæður leyfðu.

Fjársterkt

Horn var í lok þriðja ársfjórðungs á þess ári, þegar síðustu opinberu upplýsingar um fjárhagsstöðu félagsins voru birtar, afar fjársterkt félag. Það var með ríflega 32 milljarða í eigið fé, þ.e. eignir umfram skuldir. Virði eigna var um 43 milljarðar en skuldir um ellefu milljarðar.