20 ár of stuttur samningstími

Friðrik J. Arngrímsson, framkvæmdastjóri Landssambands íslensra útvegsmanna, er ósáttur við kvótafrumvarpið sem birt var á vef sjávarútvegsráðuneytisins í gær. Ástæðurnar eru margvíslegar.

Á vef LÍÚ bendir Friðrik meðal annars á of stuttan samningstíma, ekki nægjanlega skýr ákvæði um framlengingu samningstíma, tillögur um að allt of stór hluti aflaheimilda verði tekinn framhjá aflahlutdeild til pólitískrar úthlutunar og yfirvofandi ofurskattlagning með lamandi áhrifum á sjávarútvegsfyrirtæki.

Friðrik segir að 20 ár séu allt of stuttur samningstími. Hann bendir á að á síðasta vetri hafi komið fram frumvarp um styttingu afnotatíma orkufyrirtækja sem nýta vatn og jarðhita annars vegar í 30 ár og hinsvegar í 40 ár, en það hafi ekki orðið að lögum vegna andspyrnu sem það mætti. „Útvegsmenn eiga ríkari rétt en þeir sem nýta vatns- og jarðhitaréttindi í eigu ríkisins enda hafa þeir keypt stærstan hluta aflaheimilda en jafnframt skapað sér og Íslandi rétt með veiðum úr deilistofnum," segir Friðrik á vef LÍÚ.