María Lilja um nærfatamæðgur: Auglýsing með margar klámtilvísanir

„Þykir okkur ekki undarlegt að stilla upp móður og dóttur í kynþokkafullum nærklæðum í auglýsingu og eru  það ekki eðlileg viðbrögð allra að staldra aðeins við og spyrja nokkurra siðferðisspurninga?“ spyr femínistinn María Lilja Þrastardóttir, sem gagnrýnir íslensku mæðgurnar sem voru í nærfataauglýsingu á vegum undirfatafyrirtækisins The Lake & Stars.

Auglýsingin var birt á bandaríska vefnum Huffington Post og hneyksluðust margir Bandaríkjamenn á auglýsingunni. Þá ekki síst vegna þess að mæðgur sátu léttklæddar fyrir.

Á vef Smugunnar gagnrýnir María Lilja viðhorf Íslendinga til auglýsingarinnar, sem var að öllu jöfnu jákvætt, að hennar mati.

„Nú veit ég ekki hvað veldur en velti því þó fyrir mér hvort fólk sé upp til hópa orðið svo gegnsýrt af klámvæðingunni að það átti sig ekki á því á hvað það er að horfa?“

Skrifar María Lilja og útskýrir að auglýsingin hafi margar tilvísanir í klám.

„Þarna höfum við tvær fallegar, grannvaxnar konur á undirfötum sem eru auglýst sem „sexy lingerie”. Þær eru klæddar í sokkabönd og liggja ansi frjálslega og opinmynntar með tómt augnaráð við hlið nokkurra viðardrumba, sem mætti hæglega túlka sem reðurtákn.“

Hægt er að lesa áhugaverðan pistil Maríu Lilju hér.