Einn vildi halda vöxtunum óbreyttum

Einn nefndarmanna í peningastefnunefnd Seðlabanka Íslands vildi halda stýrivöxtum óbreyttum á síðasta vaxtaákvörðunardegi, 2. nóvember sl., en aðrir vildu hækka um 0,25 prósentur. Stýrivextir voru hækkaðir úr 4,5% í 4,75%. Þetta kemur fram í fundargerð peningastefnunefndar vegna ákvörðunarinnar en hún var birt í dag á vef nefndarinnar í takt við lög þar um.

Í fundargerðinni segir að Már Guðmundsson, formaður nefndarinnar og seðlabankastjóri, hafi gert tillögu um að vextirnir yrðu hækkaðir sem fyrr sagði og á það hefðu fjórir nefndarmenn fallist að Má meðtöldum. Meginrökin voru þau að "veruleg hætta" væri á að mikil verðbólga, sem mælist nú 5,3%, festist í sessi ef ekkert yrði að gert, en verðbólgumarkmið seðlabankans er 2,5%. Enn fremur voru merki um efnahagsbata hér á landi, og takmörkuð áhrif af erfiðleikum á alþjóðamörkuðum á íslenskt efnahagslíf, talin upp sem rök fyrir því að hækka vexti.

Nefndarmaðurinn eini sem lagðist gegn þessum sjónarmiðum hélt því fram "að vaxtahækkun hefði fyrst og fremst þau áhrif að tekjum yrði endurdreift frá fyrirtækjum, heimilum og ríkissjóði til lánveitaenda, en það myndi skaða viðkvæma efnahagsreikninga enn frekar og tefja úrlausn skuldakreppunnar."

Sem fyrr eru nöfn nefndarmanna ekki birt þegar sjónarmið þeirra eru reifuð. Í nefndinni sitja Már Guðmundsson, seðlabankastjóri, Arnór Sighvatsson, aðstoðarseðlabankastjóri, Þórarinn G. Pétursson, aðalhagfræðingur, Anne Sibert, prófessor, og Gylfi Zoega, prófessor við Háskóla Íslands.

Sjá má fundargerð peningastefnunefndar Seðlabanka Íslands hér.