Forseti ASÍ vill tengja krónuna við evru

Gylfi Arnbjörnsson, forseti ASÍ, segir að krónan eigi sér ekki viðreisnar von og hugsanlega sé best að leita leiða til þess að tengja hana beint við evruna. Þetta sagði Gylfi á árlegum formannafundi ASÍ sem haldinn var í morgun.

Hann sagði að ræða ætti milliliðalaust við pólitíska forystumenn ríkja í Evrópu um beina aðstoð í gjaldmiðlamálum. „...hugsanlega með því að tengja krónuna beint við evruna með stuðningi frá bæði AGS og Norðurlöndunum. Þannig gæti almenningur og fyrirtæki fyrr notið þeirra vaxtalækkana og stöðugleika sem við þurfum á að halda. Við eigum ekki að láta skammtíma vanda evru, dollars og jens villa okkur sýn," sagði Gylfi.

Gylfi sagði að evran væri eins og klettur í hafinu borið saman við þá krónu sem Íslendingar búi við. Þá væri vandi dollarsins enn meiri en evrunnar þar sem viðskiptahalli og halli á fjárlögum sé töluvert meiri en í Evrópu.