Magnús: Ég varði nokkra verðmæta bolta

Magnús Gunnar Erlendsson, markvörður Fram, lokaði marki sínu þegar á reyndi í kvöld gegn Akureyri. Þegar Norðanmenn voru að komast aftur inn í leikinn skellti Magnús í lás og drap allar vonir Akureyringa.

"Þetta var ekki auðvelt. Ég veit ekki hvað er að hjá okkur. Við girðum okkur ekki í brók fyrr en í hálfleik. Við verðum að byrja leikina fyrr," sagði Magnús en hvað með eigin hlut?

"Ég náði að taka mjög verðmæta bolta sem hjálpaði til. Strákarnir unnu fyrir þessu í síðari hálfleik. Þá voru þeir mjög góðir," sagði Magnús.

Fram er á toppnum með fullt hús en liðinu var spáð fjórða til fimmta sæti fyrir mót. Er verið að vanmeta liðið?

"Það kemur í ljós. Við lítum vel út. Hópurinn er samt enn að slípast saman."