Vaxtahækkunin í takt við spá greiningar Íslandsbanka

Ingólfur Bender forstöðumaður greiningar Íslandsbanka segir að ákvörðun Peningastefnunefndar Seðlabankans um að hækka stýrivexti bankans um 0,25 prósentur var í takti við þeirra spá. Aðrar opinberar spár gerðu ráð fyrir óbreyttum vöxtum.

„Peningastefnunefndin rökstyður ákvörðun sína á þann hátt sem við reiknuðum með þ.e. með því að verðbólguhorfur hafa versnað og að hætta er á að hærri verðbólguvæntingar festi verðbólguna í sessi," segir Ingólfur.

Verðbólgan er nú 5%, hefur aukist umtalsvert á þessu ári og er langt yfir verðbólgumarkmiði bankans. Verðbólgan stefnir hærra á næstu mánuðum og spáir bankinn því að hún verði 6,8% á fyrsta ársfjórðungi næsta árs en hjaðni svo aftur á næsta ári og verði komin í verðbólgumarkmið bankans á þriðja ársfjórðungi árið 2013.

Peningastefnunefndin gefur til kynna í yfirlýsingu sinni sem birt var í morgun að frekari vaxtahækkana megi vænta á næstunni. Segja þeir að til þess að draga úr hættu á því að hærri verðbólguvæntingar og veikt gengi krónunnar festi of mikla verðbólgu í sessi og til að sporna gegn aukinni verðbólgu og hugsanlegum þrýstingi á gengi krónunnar kunni að vera þörf á því að hækka vexti frekar.

„Við reiknum með því að bankinn muni hækka vexti sína um 0,5 prósentur til viðbótar fyrir lok árs," segir Ingólfur.