Foringi Black Pistons í átökum á Litla-Hrauni

Foringi Black Pistons, Ríkharð Júlíus Ríkharðsson, virðist ekki eiga sjö dagana sæla inni á Litla-Hrauni en hann lenti í átökum við tvo pilta á tvítugsaldrinum fyrir skömmu. Samkvæmt heimildum Vísis á Ríkharð að hafa verið skallaður í andlitið af nítján ára samfanga sínum eftir að hann á að hafa ruðst inn í klefa piltsins með það að markmiði að taka rafmagnstæki af honum í leyfisleysi.

Sá yngri brást ókvæða við og sló Ríkharð niður í gólfið.

Vísir leitaði eftir upplýsingum um málið hjá fangelsismálayfirvöldum. Þar fékkst staðfesting á því að átök hefðu átt sér stað. Ekki hefði þó þurft að kalla til sérstaka sérsveit, sem hefur sérstaklega verið efld vegna glæpasamtaka hér á landi. Þá hefðu pústrarnir ekki leitt af sér refsingu fyrir þá sem í hlut áttu.

Samkvæmt heimildum Vísis á Ríkharð að hafa lent í samskonar samstuði við sautján ára pilt í fangelsinu. Þar beið Ríkharð einnig lægri hlut.

Black Pistons á Íslandi hlaut nýverið stöðu Outlaws Prospect. Ríkharð, ásamt félaga sínum, Davíð Frey Rúnarssyni, voru handteknir í maí eftir að þeir eiga að hafa beitt mann, sem þeir réðust á og héldu nauðugum, hrottalegu ofbeldi.

Þeir eru sakaðir um að hafa barið hann klukkustundum saman í höfuðið og líkama með ýmsum áhöldum, hýtt hann með þykkri rafmagnssnúru og hótað honum að skornar yrðu í sundur sinar á fótleggjum og tennur dregnar úr honum. Þeir sögðu fórnarlambinu að það skuldaði þeim tíu milljónir króna. Sá sem varð fyrir árásinni var áður hluti af Black Pistons klúbbnum.

Enn fremur hefur lögreglan fengið upplýsingar um að Davíð Freyr hafi svipt annan mann frelsi og haldið föngnum og misþyrmt í bifreið og í iðnaðarhúsnæði.

Ríkharð virðist þó njóta takmarkaðrar virðingar innan veggja Litla-Hrauns þar sem hann er uppnefndur sem „nunnan“ þar á bæ. Þegar heimildarmaður Vísis er spurður hversvegna hann sé kallaður það, svarar hann því til að Ríkharð þykir bera sig eins og nunna að mati samfanga.