Eftirmálar Icesave - þjóðin afvegaleidd?

Íslenska þjóðin mun líklega ekki þurfa að greiða krónu af Icesave skuldinni, hugsanlega verður ekkert dómsmál höfðað fyrir EFTA dómstólnum og breska og hollenska ríkið munu fá sitt. Hvers vegna reyndu íslenskir ráðamenn þá allt sem í þeirra valdi stóð til að fá þjóðina til að samþykkja Icesavesamninginn í þjóðaratkvæðagreiðslu?

Í Íslandi í dag var farið yfir eftirmála Icesave málsins og rædd við Steingrím J. Sigfússon fjármálaráðherra. Steingrímur segir ábyrgð Icesave málsins ekki hans. Hendur ríkisstjórnarinnar hafi verið bundnar af ákvörðunum þeirra sem áður stóðu við stjórnvölinn og samstarfinu við Alþjóðagjaldeyrissjóðinn.

„Hugsum okkur bara það að við værum búin að leysa þetta mál fyrir nærri tveimur árum síðan jafnvel þó það lægi inn í framtíðinni núna einhver núvirt skuldbingi upp á einhverja 70 milljarða sem við byrjuðum að borga 2016. Já, hver veit nema það hefði verið betri kostur fyrir þjóðarbúið en að standa í þessum illdeilum í tvö ár í viðbót með þeim vandræðum og töfum sem það hefur haft í för með sér. Það verður aldrei hægt að reikna það út."

Steingrímur segist ekki hafa verið í öfundsverðu hlutverki í Icesave málinu.

„Ef við hefðum nýja samninginn þá væri Ísland laust allra mála og málið búið. Nú er það ekki gert og þá sjáum við hvernig vinnst úr þessu. Og góðu fréttirnar eru þær að eignir Landsbankans munu líklega ná yfir þetta og þá eigum við að láta það eftir okkur að gleðjast yfir því. Og ég get bara sagt það. Ég hef góða samvisku gagnvart öllu sem ég hef gert í þessu máli. Ég bjó það ekki til. Það eru aðrir sem hafa gert það. Mitt öfundsverða hlutskipti, eða hitt þó heldur, hefur verið að reyna að leysa það eins og skást var metið í stöðunni á hverjum tíma."

Fréttaskýringuna um Icesave má sjá hér fyrir ofan og viðtalið við Steingrím mun birtast í heild sinni á Vísi í kvöld.