Akureyringar komnir í 1-0 gegn HK

Deildarmeistarar Akureyringar unnu í kvöld þriggja marka sigur á HK í fyrsta leik liðanna í undanúrslitum N1-deildar karla, 26-23

Akureyringar voru nokkuð seinir í gang í kvöld og voru því HK-ingar með frumkvæðið í fyrri hálfleik eftir að hafa komist í 4-1 á upphafsmínútunum.

Björn Ingi Friðþjófsson fór mikinn í marki HK og Ólafur Bjarki Guðmundsson raðaði inn mörkunum. Hann var alls með sjö mörk í fyrri hálfleiknum.

En Sveinbjörn Pétursson átti líka góðan dag í marki Akureyrar og þegar hann fór í gang fóru Akureyringar hægt og rólega að vinna sig inn í leikinn.

Akureyri skoraði síðustu tvö mörk hálfleiksins og jafnaði um leið metin, 13-13. Heimamenn skoruðu einnig fyrsta markið í síðari hálfleik og létu forystuna aldrei af hendi eftir þetta.

HK náði mest að minnka muninn í tvö mörk á síðasta stundarfjórðungnum og fögnuðu heimamenn því góðum sigri í leikslok.

Helsti munurinn á liðunum í kvöld að sóknarleikurinn dreifðist á fleiri menn hjá heimamönnum á meðan að Ólafur Bjarki var nánast sá eini í liði HK sem tók af skarið í sókninni. Þá munaði einnig miklu um varnarleik Akureyringa sem batnaði til muna í seinni hálfleik.

Næsti leikur liðanna verður á laugardaginn kl. 16.

Akureyri - HK 26 - 23 (13 - 13)Mörk Akureyrar (skot): Bjarni Fritzson 7/2 (11/2), Oddur Gretarsson 6/1 (10/1), Daníel Örn Einarsson 4 (5), Guðmundur H. Helgason 4 (10), Hörður Fannar Sigþórsson 2 (2), Bergvin Þór Gíslason 1 (1), Heimir Örn Árnason 2 (4), Jón Heiðar Sigurðarson (1)

Varin skot: Sveinbjörn Pétursson 19/1 (42/4, 45%), Stefán Guðnason 2 (2/1, 100%)

Hraðaupphlaup: 3 (Bjarni 1, Heimir Örn 1, Oddur 1)

Fiskuð víti: 3 (Guðmundur H. 2, Bjarni 1)

Utan vallar: 8 mínútur

Mörk HK (skot): Ólafur Bjarki Ragnarsson 10 (16), Sigurjón F. Björnsson 3 (3), Atli Ævar Ingólfsson 3 (5), Leó Snær Pétursson 2 (4), Daníel Berg Grétarsson 2/2 (5/3), Bjarki Már Elísson 2/1 (6/2), Vilhelm Gauti Bergsveinsson 1 (2), Bjarki Már Gunnarsson (1), Atli Karl Bachmann (1), Hörður Másson (1)

Varin skot: Björn Ingi Friðþjófsson 17 (42/3, 40%).

Hraðaupphlaup: 4 (Ólafur Bjarki 3, Bjarki Már 1)

Fiskuð víti: 5 (Vilhelm Gauti 2, Bjarki Már 1, Ólafur Bjarki 1, Atli Ævar 1)

Utan vallar: 8 mínútur