Ólafur Bjarki: Frábær stemmning hjá okkur í kvöld

„Frábær leikur hjá okkur og mikilvægur sigur," sagði Ólafur Bjarki Ragnarsson, leikmaður HK, eftir sigurinn í kvöld. HK vann glæsilegan sigur á Fram, 35-26, í Safamýrinni og tryggði í leiðinni sæti sitt í undanúrslitum Íslandsmótsins. Ólafur Bjarki átti frábæran leik og skoraði 9 mörk úr öllum regnbogans litum.

 

„Það var frábær stemmning hjá liðinu í kvöld og við höfðum gríðarlega gaman af því að spila handbolta eins og sást kannski á fagnaðarlátunum hjá okkur, en við fögnuðum hverju marki gríðarlega".

 

„Varnarleikurinn hjá okkur var sérstaklega góður í kvöld og þá kom markvarslan í leiðinni, en Bjössi (Björn Ingi Friðþjófsson) var frábær í kvöld og hjálpaði okkur mikið," sagði Ólafur.

 

„Við keyrðum virkilega hratt í bakið á þeim en í leiðinni dreifðum við álaginu á leikmönnunum og unnum frábæran sigur," sagði Ólafur Bjarki að lokum.