Þjóðin þarf að þola laun bankastjóranna

Efnahags- og viðskiptaráðherra segir ekki óeðlilegt að bankarnir hagi launum æðstu stjórnenda þannig að almenningur þoli þau, á sama tíma og innistæður bankanna séu tryggðar af ríkinu.

Ríkisstjórnin ræddi launamál bankastjóra stóru viðskiptabankanna í morgun. En bankastjórar Arion og Íslandsbanka, eru vel á þriðju milljón króna á mánuði. Efnahags og viðskiptaráðherra minnir á að þótt þetta séu einkabankar séu þeir í samstarfi við ríkisvaldið og innistæður í þeim séu tryggðar af ríkinu.

 „Og það er ekkert óeðlilegt að fara fram á það á meðan slíkt ástand vari, hagi þeir ákvörðunum um kjör í samræmi við það sem almenningur þolir,“ segir Árni Páll Árnason efnahags- og viðskiptaráðherra.

Hann er ekki sannfærður um að hár viðbótarskattur á atvinnulaun af þessu tagi sé lausnin, margar aðrar leliðir komi til greina.

Þegar ráðherrann var spurður hvort til greina kæmi að afnema tryggingu ríkisins á innistæðum einkabankanna sagði hann fulla ástæðu til að ræða við bankana um með hvaða hætti þeir treystu sér til að vinna með stjórnvöldum að tryggja samfélagslega ábyrga launastefnu.

„Á þessum tímum þegar þeir þurfa auðvitað á ríkisvaldinu að halda og ríkisvaldið er að vinna með bönkunum að endurreisn fjármálakerfisins,“ segir Árni Páll.

Laun bankastjóra Landsbankans, sem er að mestu í eigu ríkisins,  eru engin smánarlaun en þó mun lægri en bankastjóra Arion og Íslandsbanka sem eru að mestu í eigu kröfuhafa. Steingrímur J. Sigfússon fjármálaráðherra útilokar ekki háan skatt á ofurlaun.

„Ég tel það vel koma til greina já, ef við förum að sjá einhvera þróun í átt til ofurlauna ganga í garð strax eftir hrun. Ég tala nú ekki um í fjármálageiranum . Þá á að taka á því,“ segir fjármálaráðherra. Það séu ýmsar leiðir til þess. Hægt væri að skattleggja sérstaklega kaupauka og bónusa og setja viðbótarálag á allra hæstu laun.