Kristján Arason: Þetta er á réttri leið

„Það var kominn tími á að vinna þá,“ sagði Kristján Arason, þjálfari FH, eftir að liðið vann sigur á toppliði Akureyrar í N1-deildinni í kvöld. Liðin mættust tvívegis á Akureyri í síðustu viku og unnu heimamenn þá báða leikina.

„Við spiluðum fantagóðan leik núna og þá sérstaklega í seinni hálfleik. Við þurftum að gera það til að vinna þá. Lengi framan af náðu þeir að stoppa þessi hraðaupphlaup og það var í raun og veru þeirra besti maður, Sveinbjörn (Pétursson) sem kom í veg fyrir að við vorum meira yfir í hálfleik.“

„Ég er mjög ánægður með liðið í dag. Reyndar voru langir kaflar á Akureyri góðir svo þetta er á réttri leið. Við erum í raun að auka breiddina. Örn Ingi kominn inn og Óli Gúst kemur sterkur inn. Ég er bara mjög ánægður.“

Kristján segir þetta óskabyrjun á síðasta þriðjungi mótsins. „Það er ekki leiðinlegt að ná að vinna efsta liðið. Akureyri er með mjög sterkt lið svo við erum ánægðir með tvö stig,“ sagði Kristján.