Valsmenn stoppuðu sigurgöngu HK-inga

Valur vann fjögurra marka sigur á HK, 32-28, í N1 deild karla í kvöld en leikurinn fór fram á heimavelli HK í Digranesi. HK átti möguleika á því að komast upp í annað sætið með sigri en dettur þess í stað niður í fjórða sætið.

HK var búið að vinna fyrstu þrjá leiki sína eftir HM-fríið en þetta var annar sigur Valsmanna í Digranesinu í vetur.

HK var 17-16 yfir í hálfleik eftir að Valur hafði komist tveimur mörkum yfir um miðjan fyrri hálfleikinn. Valsmenn áttu frábæran kafla í seinni hálfleik þegar liðið skoraði sex mörk í röð og breytti stöðunni úr 18-16 fyrir HK í 18-22 fyrir Val.

Valsmenn náðu í kjölfarið mest fimm marka forystu en HK tókst að jafna metin í 27-27. Valsmenn skoruðu hinsvegar fimm af síðustu sex mörkum leiksins og tryggðu sér sinn þriðja sigur í röð í öllum keppnum.

Valur á enn smá möguleika á því að komast í úrslitakeppnina en liðið er með tólf stig, fimm stigum minna en Haukar sem eru í 5. sætinu og sex stigum minna en HK sem er í 4. sæti.



HK-Valur 28-32 (17-16)

Mörk HK: Atli Ævar Ingólfsson 9, Bjarki Már Elísson 6,

Ólafur Bjarki Ragnarsson 5, Hörður Másson 4, Bjarki Már Gunnarsson 1, Hákon Bridde 1, Sigurjón Friðbjörn Björnsson 1, Leó Snær Pétursson 1.

Mörk Vals: Heiðar Þór Aðalsteinssson 10, Valdimar Fannar Þorsson    8, Finnur Ingi Stefansson 5, Sturla Asgeirsson 5, Ernir Hrafn Arnarsson 2, Orri Freyr Gislason 1, Alex Jedic 1.