Handbók stjórnarmanna gefin út

KPMG á Íslandi hefur gefið út Handbók stjórnarmanna í samstarfi við Landssamtök lífeyrissjóða, Samtök atvinnulífsins, Samtök fjármálafyrirtækja og Viðskiptaráð Íslands. Í tilkynningu frá fyrirtækinu segir að með útgáfu handbókar af þessu tagi sé á einum stað yfirlit yfir hlutverk, ábyrgð og skyldur stjórnarmanna. „Slík handbók mun nýtast stjórnarmönnum félaga í störfum sínum, veita þeim aukið öryggi og leiða til betri stjórnarhátta í íslensku atvinnulífi."

Þá segir að umfjöllun um stjórnarhætti hafi sjaldan verið eins mikil og nú eftir undangengnar hræringar í efnahagslífinu. „Ýmsar spurningar hafa vaknað um stjórnarhætti sem hafa viðgengist í íslensku atvinnulífi og er viðskiptasiðferði í mörgum tilvikum dregið í efa. Samfélagið kallar á breytt vinnulag hjá félögum og að stjórnarmenn og stjórnendur axli ábyrgð á gerðum sínum."

Einnig kemur fram að handbókin taki mið af leiðbeiningum um stjórnarhætti fyrirtækja sem Viðskiptaráð Íslands, Nasdaq OMX Iceland hf. og Samtök atvinnulífsins gáfu út árið 2009, eftir því sem við á. „Í handbókinni er að finna umfjöllun um atriði sem geta haft slæm áhrif á starfshætti og/eða starfsemi félagsins og stjórnarmenn ættu ekki að leiða slíkt hjá sér heldur staldra við, meta áhrifin og bregðast við."