Meistarinn að missa af lestinni í titilslagnum

Jenson Button komst ekki í stigasæti í Formúlu 1 mótinu í Suður Kóreu í dag og staða hans í stigamótinu er ekki vænleg, þó hann eigi enn möguleika á að verja meistaratitil sinn frá því í fyrra. Button varð tólfti í mótinu í dag. Aðeins tvö mót eru eftir. Næst verður keppt í Brasiíu eftir tvær vikur og síðan í Abu Dhabi í lok nóvember. "Það þurfa allir aðrir að falla úr leik. Þannig er staðan, en bíllinn var ókeyrandi í dag", sagði Button um möguleika sína á BBC hvað titilvörnina varðar samkvæmt frétt á autosport.com. Fimm ökumenn eiga enn möguleika á meistaratitli að Button meðtöldum. Fernando Alonso er efstur eftir sigur í dag með 231 stig. Mark Webber er með 220, Lewis Hamilton 210, Sebastian Vettel 209 og Button 189, en 50 stig eru í pottinum fyrir sigur. "Titilvörn minni er nánast lokið ef hinir kapparnir lenda ekki í ógöngum. En það er ekki hægt að vinna meistaratitil ef maður missir móðinn. Maður verður að berjast til þrautar. Við sjáum á Red Bull hvað þetta getur snúist hratt til betri vegar. Það verður ekki auðvelt, en það er enn möguleiki", sagði Button. Button var í vandræðum með grip á McLaren bílnum í bleyttini í Suður Kóreu í dag, en mismunandi útfærsla var á McLaren bílunum tveimur, en Hamilton náði öðru sæti á eftir Alonso.