Aðskilnaður trúfélaga og skóla ræddur í Hafnarfirði

Lögð var fram tillaga um aðskilnað trúfélaga frá skólastarfsemi hjá fræðsluráði Hafnarfjarðar í dag. Samkvæmt formanni ráðsins, Guðrúnu Ágústu Guðmundsdóttur, oddvita Vinstri grænna, þá er tillagan eingöngu til umræðu.

„Þetta var lagt fram og verður svo lagt undir skólasamfélagið auk þess sem það þarf að finna út hvernig þetta gengur fyrir sig innan skólanna í dag," segir Guðrún en ábendingin barst til ráðsins í gegnum íbúagáttina, það er að segja, íbúi sendi tillöguna inn með tölvupósti.

„Tillagan kemur í kjölfar tilfinningaróts í Reykjavík," segir Guðrún en meirihluti mannréttindaráðs Reykjavíkurborgar hefur lagt fram tillögu þar sem lagt er til aðskilnað trúfélaga og skóla. Umræðan um tillögurnar hefur verið hörð enda tillögurnar vægast sagt umdeildar.

Guðrún segir málið alls ekki komið í farveg í Hafnarfirði með öðrum hætti en að það sé til umræðu. Það væri þá ekki fyrr en á næsta fundi fræðsluráðs sem ákvörðun um framhald tillögunnar verður tekin.

Aðspurð hvort það hafi verið kvartað undan trúfélögum í skólum í Hafnarfirði svarar Guðrún því til að engar formlegar kvartanir hafi borist.

„Þetta er bara tekið fyrir í rólegheitum, enda er ég ekki fylgjandi neinni sprengjuumræðu," segir Guðrún að lokum.

Næsti fundur fræðsluráðs verður haldinn eftir hálfan mánuð.