Einar: Þeir áttu engin svör gegn okkur

Einar Jónsson, þjálfari Fram, var að vonum ánægður með sitt lið þegar það vann frábæran sigur gegn Gróttu á Seltjarnarnesinu.

„Ef við værum búnir að spila svona vörn í allan vetur þyrftum við ekki að hafa áhyggjur af neinu. Þeir áttu engin svör við okkur, sama hvort við vorum fimm eða sex í vörninni. Þetta var frábært," sagði Einar sem hrósaði markverði sínum að sjálfsögðu í hástert.

„Maggi var geðveikur. Ég held að við höfum verið einhverjar 40 mínútur einum færri. Vorum með vitlausar innáskiptingar trekk í trekk en það breytti engu. Ég held að við höfum meiraðsegja náð að vinna boltann fjórir á móti sex."

„Það er klárlega úrslitaleikur hjá okkur á fimmtudaginn. Liðið sem vinnur kemst pottþétt í umspil og ef það verða hagstæð úrslit í leik Gróttu og Vals tryggir það sér öruggt sæti," sagði Einar en Framarar leika gegn Stjörnunni á fimmtudagskvöld í Mýrinni.