Örn Ævar sló næstum inn í klúbbhúsið

Örn Ævar Hjartarson úr GS sló annað höggi inn á 18. braut nánast inn í klúbbhúsið í dag á Íslandsmótinu í golfi sem fer fram á Kiðjabergsvelli. Annað högg Arnar misheppnaðist algjörlega. Hann var um 100 metra frá flötinni og sló hátt og missti boltann til vinstri. Boltinn hafnaði við gaflinn á klúbbhúsinu en á heimasíðu GKB segir að klúbbfélagar hafi sjaldan séð bolta lenda á þessum stað við 18 flötina. "Ég hélt að boltinn hefði farið í golfbíl sem var þarna í línunni. Það hefði kannski bara verið betra því þá hefði boltinn getað hoppað af bílnum og inn á flötina," sagði Örn Ævar við heimasíðu GKB með bros á vör og gerði grín af ölllu saman. Hann leysti þetta högg vel, sló inn á flötina og boltinn rúllaði svona þrjá metra fram hjá holunni. Hann átti því nokkuð erfitt pútt eftir niður í móti fyrir pari. Hann var aðeins of stuttur í púttinu og varð að sætta sig við skolla. Örn lék hringinn á 75 höggum og er í 9. sæti á samtals 5 höggum yfir pari.