Seðlabankinn keypti krónueignir á aflandsgengi

Seðlabanki Íslands og íslenska ríkið njóta því hagstæðari gengiskjara í kaupum sínum á krónueignum frá Seðlabankanum í Lúxemborg en opinbert gengi krónunnar segir til um.

Íslensku skuldabréfin sem Seðlabankinn og íslenska ríkið kaupa af Seðlabankanum í Lúxemborg eru greidd með 402 milljóna evra skuldabréfi útgefnu af ríkissjóði til fimmtán ára, 35 milljónum evra í reiðufé og 6 milljörðum króna í reiðufé.

Már Guðmundsson, seðlabankastjóri, sagði á símafundi með blaðamönnum í morgun að ekkert gengi væri skráð í viðskiptunum, þar sem þau færu ekki fram í gegnum skipulagðan gjaldeyrismarkað.

Miðað við ofangreindar forsendur má þó reikna út að 250 krónur fást í skiptum fyrir eina evru. Samkvæmt gengisskráningu Seðlabankans er evran 160 krónur í dag. Gengið í viðskiptunum er hins vegar nálægt aflandsgengi krónunnar.

Þetta er jákvætt fyrir skattgreiðendur í ljósi þess að skuldabréfið er útgefið af ríkissjóði, sem segja má að njóti afsláttarkjara við kaup á krónueignum frá Seðlabankanum í Lúxemborg.