Sigurður Erlingsson framkvæmdastjóri Íbúðalánasjóðs

Stjórn Íbúðalánasjóðs hefur ráðið Sigurð Erlingsson sem framkvæmdastjóra sjóðsins samkvæmt frétt á vefsíðu Viðskiptablaðsins.

Þar kemur fram að Sigurður er viðskiptafræðingur af endurskoðunarsviði frá Andrews University í Bandaríkjunum (1994), löggiltur verðbréfamiðlari (1998), með M.Sc. í viðskiptafræði frá Háskóla Íslands með áherslu á fjármál (2003) og MBA frá Háskólanum í Reykjavík (2010).

Sigurður starfaði hjá Landsbanka Íslands hf. frá 2000-2008, fyrst sem sérfræðingur í greiningardeild og síðar sem forstöðumaður á alþjóðasviði bankans.

Ráðning framkvæmdastjóra hjá Íbúðalánasjóði hefur gengið brösulega en auglýsa þurfti starfið á ný eftir að stjórn sjóðsins var ósammála um hvern skyldi ráða.

Þá stóð til að ráða Ástu H. Bragadóttur, sem hefur gegnt starfinu frá því Guðmundur Bjarnason hætti í sumar.

Árni Páll Árnason, félagsmálaráðherra vildi skipa sérstaka valnefnd til þess að velja framkvæmdastjóra. Ásta sótti ekki aftur um starfið eftir að það var auglýst á ný.

Sigurður er giftur Nönnu Guðnýju Sigurðardóttur sjúkraþjálfara og saman eiga þau einn son. Sigurður mun hefja störf hjá Íbúðalánasjóði á næstu dögum samkvæmt vb.is.