Mikilvægt að vinna fyrsta mótið

Stefano Domenicali, framkvæmdarstjóri Ferrari telur að mikilvægt hafi verið fyrir liðið að vinna sigur í fyrsta móti ársins.

"Vissulega var þessi sigur mikilvægur fyrir liðið. Árið í fyrra var erfitt og við tókum erfiðar ákvarðanir sem reyndust réttar. Starfsmenn okkar hafa unnið hörðum höndum og með mikilli samvinnu hefur þetta tekist. Eina leiðin var að ná árangri", sagði Domenicali.

"Við erum með góðan grunn fyrir framhaldið. Mótaröðin er löng og ströng og við verðum að hafa báða fætur á jörðinni. Ég held að keppinautar okkar verði mjög áræðnir. McLaren, Red Bull og Mercedes eru sterk lið og brátt munum við sjá hvernig málin þróast. Hver mætir fyrr með nýja hluti. Það er lítill munur á milli liða og allt getur gerst.!