Segja mál sjömenninganna eiga heima á Íslandi

Ný gögn sem slitastjórn Glitnis hefur lagt fram í New York í skaðabótamálinu gegn sjömenningunum sanna ekkert og sýna að málið á ekki heima þar heldur fyrir íslenskum dómstólum, að mati lögmanna stefndu. Þá telja þeir áhuga íslensku þjóðarinnar á málinu styðja þá kröfu.

Í skjalasafni dómstólsins í New York hafa nú birst greinargerðir hinna stefndu í málinu þar sem tekin er afstaða til nýrra gagna sem slitastjórnin lagði fram með það fyrir augum að styrkja málatilbúnað sinn.

Skjölin áttu að sýna að Hannes Smárason, fyrrverandi forstjóri FL Group, hefði hlutast til um lánveitingar Glitnis banka til félagsins Hnotskurnar. Eitt skjalanna sýnir tilboð FL Group í hlutabréf eignarhaldsfélagsins Hnotskurnar ehf. í Tryggingamiðstöðinni og meðal annarra gagna eru minnisblöð af stjórnarfundum FL Group þar sem tilboðið er til umræðu.

Kim Landsman, sem gætir hagsmuna Jóns Ásgeirs, Ingibjargar, Lárusar Welding, Jóns Sigurðssonar og Þorsteins M. Jónssonar, segir í greinargerð að þessi nýju gögn styrki enn frekar kröfu um frávísun á þeim grundvelli að rétt sé að höfða málið fyrir íslenskum dómstólum.

Um sé að ræða gögn á íslensku um viðskipti íslenskra fyrirtækja. Þá er enn fremur rakið í greinargerðinni að allir hinir stefndu séu Íslendingar, öll gögn í málinu séu á íslensku, nauðsynlegt verði fyrir dómstólinn að túlka íslensk lagaákvæði við úrlausnir á grundvallaratriðum í málinu og dómur í málinu verði ekki aðfararhæfur á Íslandi, þ.e ekki verði hægt framfylgja dómnum til að krefjast greiðslna úr hendi hinna stefndu á Íslandi ef þau verða dæmd til greiðslu skaðabóta.

Þá segir í greinargerðinni að meintur tjónsatburður hafi verið á Íslandi og að íslenska þjóðin hafi sýnt málinu mikinn áhuga, þá hafi slitastjórnin aðeins höfðað málið í New York vegna þarlends réttarfars, slitastjórnin telji heppilegt að leiða málið fyrir kviðdóm. Þetta allt sé nóg til að vísa málinu frá á þeim grundvelli því sækja eigi málið fyrir réttri þinghá, þ.e íslenskum dómstólum.

Lögmaður Hannesar Smárasonar segir að sá málflutningur slitastjórnar að ný gögn um lánveitingar Glitnis til eignarhaldsfélagsins Hnotskurnar sé í besta falli villandi. Orðalagið „að hlutast til" sýni ekki á nokkurn hátt að Hannes hafi tryggt slíka lánveitingu hjá Glitni. Þá hafi slitastjórnin ekki getað sýnt fram á nein gögn til að styðja getgátur sínar um lánveitingar Glitnis til Hnotskurnar.