Icelandair Group semur við Skyggni

Icelandir Group hefur samið við tækni- og rekstarþjónustufyrirtækið Skyggni um rekstur á upplýsingatækniumhverfi félagsins til næstu þriggja ára.

Í tilkynningu segir að samningurinn gildir fyrir Icelandair Group og öll dótturfélög þess, svo sem Icelandair, Flugfélag Íslands, Icelandair Cargo, IGS, Icelandair Hotels og Fjárvakur. Um er að ræða endurnýjun á samningi milli félaganna sem hefur verið í gildi frá árinu 2001.

Helstu markmið samningsins eru að ná fram aukinni hagkvæmni, skilvirkni og öryggi í rekstri upplýsingatækniumhverfis Icelandair Group. Meðal einstakra verkefna á samningstímanum má nefna endurnýjun á Oracle umhverfi Icelandair Group og endurhögun á netþjóna- og afritunarumhverfi samstæðunnar. Ennfremur verður unnið að nýrri nálgun við rekstur útstöðva samstæðunnar.

„Fyrirtækin innan Icelandir Group byggja starfsemi sína að stórum hluta á sölu á þjónustu í gegnum netið og þurfa því að reiða sig á hnökralausan rekstur söluvefja og annarra upplýsingatæknikerfa. Samvinna við Skyggni á þessu sviði hefur gengið vel og við höfum því miklar væntingar um að þróa samstarfið enn frekar, einkum með tilliti til aukinna gæða og hagkvæmni í rekstri," segir Hlynur Elísson, framkvæmdastjóri fjármála hjá Icelandair, sem leiðir upplýsingatæknimál fyrir samstæðuna.

„Skyggnir hefur notið þess trausts að annast rekstur á umfangsmiklu upplýsingatæknikerfi Icelandair Group undanfarin ár. Það er okkur því mikil ánægja að fá tækifæri til þess að efla hið nána samstarf enn frekar og tryggja Icelandair Group áfram öryggi, gæði og hagræði í rekstri tölvukerfa þess," segir Friðrik Þ. Snorrason framkvæmdastjóri Skyggnis.

Skyggnir er dótturfélag Nýherja. Hjá Skyggni starfa um 160 ráðgjafar í tækni- og rekstarþjónustu.

Icelandair Group er samstæða fyrirtækja í flugi og ferðaþjónustu sem starfa um allan heim og hjá fyrirtækjum innan samstæðunnar starfa um 2.500 manns.