Sigurður vill 244 milljónir frá Kaupþingi

Sigurður Einarsson, fyrrverandi stjórnarformaður Kaupþings, gerir launakröfu upp á 244 milljónir króna í þrotabú fallna bankans. Hreiðar Már Sigurðsson, fyrrverandi forstjóri, virðist ekki gera launakröfu í þrotabúið.

Þetta kemur fram í yfirliti frá slitastjórn Kaupþings banka hf. sem hefur birt kröfuskrá á vefsvæði fyrir kröfuhafa. Alls var 28.167 kröfum lýst í Kaupþing.

Heildarfjárhæð lýstra krafna nam 7.316 milljörðum króna miðað við gengi Seðlabanka Íslands þann 22. apríl 2009. Heildarfjárhæðin er hærri en skuldir samkvæmt efnahagsreikningi miðað við 30. júní sl.