Frekari skattahækkanir framundan á næstu árum

Greining Arion banka telur að samkvæmt langtímaáætlun stjórnvalda um fjármál ríkisins sé verið að boða frekari skattahækkanir á árunum 2012 og 2013. Þetta kemur fram í Markaðspunktum greiningarinnar þar sem fjallað er um fjárlagafrumvarpið fyrir næsta ár.

Í Markaðspunktunum segir að gert sé ráð fyrir að ríkissjóður skili afgangi frá og með árinu 2012. Afgangurinn kemur eingöngu frá tekjuhliðinni, en gert er ráð fyrir 55-66 milljarða kr. tekjuaukningu á árunum 2012-2013 sem er athyglisverð niðurstaða í ljósi þess að forsendur hagvaxtar eru hóflegar á næstu árum en gert er ráð fyrir 2-3% hagvexti fram til ársins 2014.

„Út frá hagvaxtarhorfum er því ljóst að þessi mikla tekjuaukning stenst í raun ekki nema gripið verði til frekari skattahækkana á árunum 2012-2013. Má því velta fyrir sér hvort inni í langtímaáætluninni sem gefin var út samhliða fjárlagafrumvarpinu séu boðaðar skattahækkanir fyrir næstu ár," segir í Markaðspunktunum.

Tekjuhlið ríkissjóðs byggist á þjóðahagsspá Hagstofunnar sem birt var í júní sl. Gert er ráð fyrir rúmlega þriggja prósenta hagvexti á næsta ári, sem drifin verður áfram af kröftugum viðsnúningi í einkaneyslu og atvinnuvegafjárfestingu.

„Að okkar mati eru hagvaxtarspáin fyrir næsta ár fullbjartsýn enda er kaupmáttur fallinn og ólíklegt að hann nái sér almennilega á strik á næsta ári, þá er atvinnuleysi enn hátt og væntingar daprar hjá heimilum. Að sama skapi eru útlit fyrir að litlar framkvæmdir séu framundan og ólíklegt að af framkvæmdum verði við Helguvík, en gert er ráð fyrir þeim í spáforsendum hjá Hagstofunni," segir í Markaðspunktunum.

„Aftur á móti er ljóst að framkvæmdir við Straumsvík verða eitthvað umfangsmeiri en gert hafði verið ráð fyrir. Niðurstaðan er þó sú að verði hagvöxtur minni en þjóðhagsspá Hagstofunnar gerir ráð fyrir þá er ljóst að grípa þarf til frekari aðhaldsaðgerða til að ná fram settum markmiðum um jöfnuð í ríkisfjármálum, hvort sem er í formi skattahækkana eða frekari niðurskurði útgjalda."