Ágúst: Liðið sem vildi þetta meira vann í dag

Kvennalið KR vann öruggan sigur í Hveragerði í kvöld og hefur því jafnað metin í einvíginu um Íslandsmeistaratitilinn 1-1.

KR er búið að vinna heimavallarréttinn til baka og Ágúst Björgvinsson, þjálfari Hamars, var skiljanlega ekki sáttur. „Við komum ekki nægilega hungraðar og einbeittar í þennan leik," sagði Ágúst og ljóst að hans lið þarf að vinna aftur í Vesturbænum.

„Okkur hefur gengið vel þar en við vinnum ekki svona gott lið eins og KR með þessu hugarfari eins og við sýndum."

KR náði tökum á leiknum í öðrum leikhluta og lét þau aldrei af hendi. Hann lét heyra í sér í klefanum í hálfleik svo glumdi vel fram á gang.

„Við vorum langt frá okkar besta. Það er ýmislegt sem við þurfum að laga fyrir næsta leik. Liðið sem vildi þetta meira vann í dag," sagði Ágúst Björgvinsson eftir leik.