Nýtt samkomulag nánast tilbúið

Margframlengdur frestur stjórnvalda til að skila svari til Eftirlitsstofnunar EFTA vegna Icesave rennur út á þriðjudag. Mikið er þrýst á þingmenn stjórnarandstöðunnar að veita drögum að nýjum Icesavesamningi blessun sína, svo komast megi hjá því að málið fari fyrir EFTA-dómstólinn.

Stjórnvöld eru tilbúin með svar til Eftirlitsstofnunar EFTA í öllum meginatriðum en frestur til að svara stofnuninni rennur út eftir þrjá daga. Hefur þetta verið talin lykildagsetning í málinu en fjármálaráðherra hefur lýst yfir að ekki sé ákjósanlegt að deilan fari fyrir EFTA dómstólinn.

Þá er ljóst að það stangast á við hagsmuni Breta, Hollendinga og í raun Evrópusambandsins að rök Íslendinga gegn því að ríkinu beri lagaleg skylda til að greiða Icesave innistæðurnar verði opinber.

Helstu atriði liggja fyrir

Samkvæmt heimildum fréttastofu liggja öll helstu samningsatriði fyrir milli samninganefnda Íslendinga, Breta og Hollendinga. Enn munu þó nokkur atriði standa út af borðinu og eru samningamenn í stöðugum samskiptum. Samningar gætu jafnvel legið fyrir á næstu sólahringum.

Í drögunum sem m.a. hafa verið kynnt Samtökum atvinnulífsins og forystumönnum Landsvirkjunar kemur fram að meðaltalsvextir yrðu 2,78%. Í samningum Svavarsnefndarinnar voru vextirnir 5,5%. Fulltrúar fjármálaráðuneytisins hafa lýst því yfir á trúnaðarfundum að samkomulagið sé Íslendingum hagstætt.

Þrýst á þingmenn Sjálfstæðisflokksins

Fréttastofu er kunnugt um að forystumenn Samtaka atvinnulífsins hafi þrýst á þingmenn Sjálfstæðisflokksins að styðja fyrrirliggjandi samningsdrög. Og hefur Vilhjálmur Egilsson framkvæmdastjóri samtakanna verið í sambandi við einstaka þingmenn.

Fulltrúar í samninganefnd Íslands hafa komið þeim skilaboðum á framfæri að ekki verði gengið endanlega frá samkomulagi fyrr en stuðningur mikils meirihluta Alþingis liggi fyrir. Og þar liggur óvissan, því stjórnarandstaðan er ekki tilbúin að lýsa því yfir fyrirfram að hún greiði götu nýrrar lausnar í þinginu. Margir þingmenn sem fréttastofa hefur rætt við segjast vilja sjá endanlegan samning og skoða hann vel áður en þeir taki afstöðu.

Heimildir fréttastofu herma að stjórnvöld hafi ekki tekið ákvörðun um það hvort ESA verði svarað á þriðjudag. Það muni ráðast af því hver staðan verður í málinu þá.