Nákvæmari dómgæsla í Formúlu 1 en fótbolta vegna myndavéla

Dómaramál sem kom upp í Formúlu 1 mótinu um helgina varpaði ljósi á þá staðreynd að notkun myndavéla hefur verið viðtekinn venja í þeirri íþrótt, mitt í allri umræðunni um notkum myndvéla í fótbolta. Reyndar fannst Ferrari mönnum dómarar taka sér of langan tíma í að ákvarða refsingu á Lewis Hamilton í brautinni, sem fór framúr öryggisbíl. En FIA, sem stjórnar málum vildi skoða brot Hamiltons nákvæmlega. Dómarar FIA fóru yfir myndir af broti Hamiltons í brautinni þar sem hann fór framúr öryggisbíl og fékk refsingu fyrir. Tony Dogsins sem er sérfræðingur í Formúlu 1 vill meina að allt hafi verið kórrétt gert í Valencia á sunnudaginnn. Ólíkt því sem viðgengst á HM í fótbolta eins og hann sagði í grein á vefsíðunni autosport.com. "Við erum fljótir að gagnrýna dómara og yfirstjórnir þegar eitthvað fer úrskeiðis. En eitt skulum við hafa á hreinu. Fagmennskan og almenn skynsemi var að leiðarljósi hjá FIA í Valencia hefði ekki getað verið ólíkari vitleysunni sem viðgengst í Suður Afríku", sagði Dogdins og tiltók sérstaklega umræðuna um markið sem England skoraði gegn Þýskalandi á dögunum, sem var dæmt af. "Það vissu allir að staðan átti að vera 2-2. Þettavar fáránlegt. Formúla 1 sýndi hvernig átti að gera þetta", sagði Dogsins ennfremur í langri grein um málið. Ólafur Guðmundsson hefur starfað sem dómari á Formúlu 1 mótum og hefur því reynslu af notkun myndavéla við dóma vegna atvika sem eru í skoðun. "Lengi vel voru myndatökur ekki notaðar til að byggja á dóma í akstursíþróttum, þar á meðal Formulu 1. Það var aðallega vegna þess, hversu erfitt var að nálgast efnið nógu fljótt og draga línu með hvað mætti nota og hvað ekki", sagði Ólafur. "Með betri tækni var reglum breytt upp úr 1990 og heimilað að nota myndir, sem keppnishaldarar eða keppendur gátu lagt til. Ekki er stuðst við myndir frá öðrum nema í undantekningartilfellum. Þetta hefur gefið góða raun í akstursíþróttum og með réttum reglum og skipulagi ætti þetta ekki síður að vera mögulegt í fótbolta. Það ætti ekki að þurfa flókinn búnað til að koma því við, t.d. á marklínu og hliðarlínum. Tæknin í dag gerir mögulegt að skoða myndirnar strax eins og gert er í Formúlu 1."