Greining Arion banka spáir hjöðnun verðbólgu niður í 3%

Greiningardeild Arion banka spáir 0,4% hækkun vísitölu neysluverðs (VNV) í nóvember. Gangi spáin eftir mun tólf mánaða verðbólga mælast 3% samanborið við 3,3% í október. Þessi spá er í takt við aðrar sem birst hafa í vikunni.

Fjallað er um málið í Markaðspunktun greiningarinnar. Þar segir að helstu þættir í spánni eru að heimsmarkaðsverð á hrávörum mælt í erlendri mynt (t.d. olía, korn, kaffi og hveiti) hefur hækkað síðustu mánuði og má sjá þessar hækkanir koma fram í verðmælingunni nú í nóvember. T.a.m. mun hækkun á eldsneytisverði skila sér í +0,13% hækkun VNV að þessu sinni.

„Þá gerum við ráð fyrir áframhaldandi hækkunum á verði matvæla í nóvember, en einhverjar hækkanir komu fram í októbermælingu Hagstofunnar," segir í Markaðspunktunum.

Ekki komu heildaráhrif vegna gjaldskrárhækkunar hjá OR í síðasta mánuði þar sem enn var beðið eftir staðfestingu frá Orkustofnun vegna dreifingar rafmagns. Þessi staðfesting hefur nú fengist og mun hækka vísitöluna um 0,12%.

Þrátt fyrir að fasteignamarkaður sé í miklum hægagangi þá er húsnæðisliðurinn að hafa áhrif til hækkunar verðlags.

„Eins og glöggir lesendur muna voru áhrif húsnæðisliðarins sterk í október samkvæmt Hagstofunni, þ.e. til hækkunar. Fastlega má gera ráð fyrir því að húsnæðisliðurinn hafi áhrif til hækkunar í nóvember og desember enda tekið mið af breytingum síðustu þrjá mánuði. Þó ber að hafa þann vara á að afar erfitt getur verið að spá fyrir um þróun húsnæðisliðarins þar sem samband fasteignavísitölu FMR og Hagstofunnar er afar sveiflukennt," segir í Markaðspunktunum.

„Flugfargjöld hækkuðu í síðasta mánuði og gerum við ráð fyrir að sú hækkun gangi tilbaka í nóvember. Almennt er hækkun einn mánuðinn ávísun á svipaða lækkun þann næsta (áhrifin verða því svipuð og áttu sér stað á sama tíma í fyrra). Annars er erfitt að benda á stóra þætti sem lækka VNV í nóvember en þó gæti styrking krónunnar haft þar jákvæð áhrif."