Miklar breytingar hjá Tindastól: Þrír útlendingar út og tveir inn

Tindastólsmenn hafa ákveðið að gera miklar breytingar á liði sínu í körfuboltanum en Tindastóll hefur tapað fimm fyrstu leikjum sínum í Iceland Express deild karla og situr eitt í botnsæti deildarinnar.

Stjórn körfuknattleiksdeildarinnar og þjálfari hafa ákveðið að seghja upp þremur af fjórum erlendum leikmönnum og í staðinn koma tveir nýir bandarískir leikmenn en annars þeirra er með hollenskt vegabréf

Þeir Josh Rivers (18,6 stig í leik), Dimitar Petrushev (5,4 stig í leik) og Radoslav Kolev (1,8 stig í leik) hafa verið sendir heim en í þeirra stað koma tveir bandaríkjamenn, Sean Cunningham og Hayward Fain.

Cunningham, sem einnig er með hollenskt vegabréf, er ætlað að spila stöðu leikstjórnanda en Hayward Fain er framherji. Tindastólsmenn halda hinsvegar Dragoljub Kitanovic sem er með 16,4 stig að meðaltali í leik í vetur.

„Það var mat stjórnar og þjálfara að styrkja þyrfti leikmannahópinn og fá inn öflugri leikmenn í stað þeirra þriggja sem látnir voru fara. Með þessum breytingum vonast stjórn deildarinnar til þess að liðið komist á sigurbraut, en greinileg batamerki voru á liðinu í leiknum gegn Snæfelli á dögunum," segir í frétt á heimasíðu Tindastóls.

Sean Cunningham er væntanlegur til landsins á mánudag og stefnt er á að Hayward komi til liðsins um næstu helgi.