Nærbuxur Maddoffs boðnar upp

Nærbuxur og inniskór fjárglæframannsins Bernie Maddoffs eru meðal fimmhundruð hluta sem verða boðnir upp á laugardaginn í New York.

Uppboðshaldarinn vonast til þess að selja alla munina en þetta er annað uppboðið sem er haldið á eignum þessa alræmda fjársvikamanns sem var dæmdur í 150 ára fangelsi fyrir að stela milljörðum dollara í flókinni svikafléttu.

Auk undirfata Maddoffs verður Steinway píanóið hans boðið upp. Þá verða einnig Prada-náttbuxur eiginkonu Maddoffs boðnar upp auk trúlofunarhrings sem hann gaf henni.

Sennilega verður trúlofunarhringurinn dýrasti munurinn sem verður sleginn á uppboðinu en uppboðshaldari vonast til þess að fá um 400 þúsund dollara fyrir hringinn.

Síðasta uppboðið á eignum Maddoffs var haldið fyrir ári en þá seldust allir munirnir sem voru boðnir upp.

Alls voru hlutir boðnir upp fyrir milljón dollara og vonast bandaríska ríkið, sem stendur á bak við uppboðið, til þess að endurtaka leikinn nú.

Gert er ráð fyrir því að safnarar muni fjölmenna á uppboðið enda svik Maddoffs einhver þau stærstu sem um getur í Bandaríkjunum.

Meðal muna sem safnara eiga eftir að slást um eru inniskór í eigu Maddoffs með gullskreyttu fangamarki hans.