Fréttaskýring: Leiðarlok fyrir Singer & Friedlander

Gangi áætlanir Ernst & Young skiptastjóra Singer & Friedlander eftir um sölu á verðmætum lánasöfnum bankans má gera ráð fyrir að sögu fyrsta íslenska bankans eftir hrunið 2008 sé endanlega lokið. Aðrar stórar eignir verða þá ekki eftir í þrotabúinu ef frá er talin krafa bankans í þrotabú Kaupþings upp á rúmlega 150 milljarða kr.

Stærsta eign Singer & Friedlander voru Edge innlánin en þeim komu bresk stjórnvöld í hendur hollenska netbankans ING Direct skömmu eftir hrun Kaupþing í okótber 2008. Raunar er þeirri eignafærslu ekki að fullu lokið því ING sætti sig ekki við vaxtakjörin á þessum reikningum, það er töldu vextina of háa, og eru enn að semja við bresk stjórnvöld um þann anga yfirtökunnar.

Singer & Friedlander bankinn var stofnaður af verðbréfasalanum Julius Singer árið 1907 og var í fyrstu verðbréfamiðlun. Fimm árum síðar gekk Þjóðverjinn Ernst Friedlander til liðs við Singer en Friedlander-fjölskyldan hafði stundað bankastarfsemi í Berlín frá árinu 1830. Friedlander var að auki þekktur fyrir að hafa stofnað fyrsta heildsölubanka (merchant bank) Suður-Afríku og var um tíma stjórnarformaður kauphallarinnar í Johannesburg.

Á tímum fyrri heimstryjaldarinnar 1914-1918 misstu þeir Singer og Friedlander leyfi sitt til verðbréfamiðlunar og var þýskur ríkisborgararéttur Friedlander ástæða þessa. Í kjölfarið eða 1920 stofnuðu þeir félagar heildsölubanka undir nafninu Singer & Friedlander og viðskiptin blómstruðu.

Margir þekktir bankamenn hafa starfað hjá Singer & Friedlander en þeirra þekktastur er án efa George Soros sem síðar varð einn af helstu ofurfjárfestum heimsins og raunar þegar orðin að þjóðsögu í vestrænum fjármálaheimi.

Bankinn var skráður á markað árið 1957. Eftir nokkuð langt tímabili af yfirtökum og samrunum öðlaðist bankinn sjálfstæði sitt að nýju árið 1987. Þá var bankinn skráður í kauphöllina í London sem hlutafélag og var það allt til ársins 2005 þegar Kaupþing festi kaup á honum.

Fyrir Kaupþing voru kaupin á Singer & Friedlander stærsta útrásarverkefni Kaupþings fram að þeim tíma. Ármann Þorvaldsson tók við stöðu framkvæmdastjóra Singer & Friedlander og gengdi henni fram að október 2008 þegar bresk stjórnvöld stöðvuðu starfsemi bankans í krafti hryðjuverkalöggjafar sinnar.

Lánasöfnin sem nú eru til sölu samanstanda m.a. af „einkalánabók" upp á 1,3 milljarða punda eða hátt í 300 milljarða kr. og telur hún um 400 viðskiptavini. Af þessari upphæð fóru 219 milljónir punda í að fjármagna snekkjukaup og 90 milljónir punda í að fjármagna einkaþotur. Auk þess að 425 milljónir punda voru lánuð til fasteignakaupa.

Hér er að mestu um að ræða velstæða einstaklinga eða milljóna/milljarðamæringa og er þetta lánasafn talið standa undir fyrrgreindum tölum að mestu. Sjálfir telja Ernst & Young að þessi lán muni ekki rýrna um meir en 2% í framtíðinni.

Hinsvegar er um að ræða fyrirtækjalánabók sem er nokkuð minni að vöxtum eða upp á 824 milljónir punda., eða tæplega 200 milljarða kr. Þar af voru 16 milljónir punda lánuð til að fjármagna leikmannakaup í ensku úrvalsdeildinni. Þetta lánasafn er einnig talið traust, þó ekki eins og einkalánin en Ernst & Young reikna með að rýrnunin verði um eða undir 5% hvað þessi lán varðar.

Heimildir: Innlendar og erlendar vefsíður, einkum viðskiptafjölmiðla sem og wikipedia.org