Davíð Oddsson bauð Hreini að gerast Útvarpsstjóri

Davíð Oddsson bauð Hreini Loftssyni að gerast Útvarpsstjóri Ríkisútvarpsins haustið 1997. Þetta fullyrðir Hreinn í aðsendri grein á Pressunni.

Hreinn segir að þeir Davíð hafi átt langt samtal um þetta tilboð hans í Ráðherrabústaðnum við Tjarnargötu og fengið sér göngutúr um Þingholtin þar sem hann hafi áfram talað um þetta.

„Ég hafnaði boðinu skömmu síðar. Í fyrsta lagi vegna þess að það var ávallt stefna mín þegar ég gegndi pólitískum trúnaðarstörfum fyrir Sjálfstæðisflokkinn sem aðstoðarmaður ráðherra að nýta þá stöðu ekki sem stökkpall í embætti á vegum ríkisins. Í öðru lagi fannst mér það vera stílbrot að gerast kerfiskarl hjá Ríkisútvarpinu eftir að hafa gegnt formennsku í framkvæmdanefnd um einkavæðingu þar sem verkið laut einmitt að því að koma verkefnum frá ríkinu og yfir til einkaaðila. Í þriðja lagi var lögmennskan mér hugleikin og mér leið vel á eigin vegum," segir Hreinn í pistlinum.

Árið 1997 var Björn Bjarnason menntamálaráðherra og Gunnlaugur Sævar Gunnlaugsson var formaður útvarpsráðs.