Smálánafyrirtæki Bjarna Ármanns selt á þrjá milljarða

Smálánafyrirtækið Folkia, sem var að hluta í eigu Bjarna Ármannssonar, fyrrverandi forstjóra Glitnis, var nýlega selt bandarísku fyrirtæki fyrir þrjá milljarða. Gera má ráð fyrir að Bjarni hafi fengið 300 milljónir fyrir sinn snúð, en 800 milljóna króna skuld hans við skilanefnd Glitnis stendur þó enn ógreidd.

Folkia var stofnað í Osló í ársbyrjun 2007 en fyrirtækið er leiðandi á smálánamarkaðnum í Noregi, Svíþjóð og Eistlandi. Velta fyrirtækisins á síðasta ári nam 115 milljónum norskra króna, jafnvirði 13,6 milljarða íslenskra króna.

Fyrirtækið veitir sambærilega þjónustu og smálánafyrirtækin Kredia og Hraðpeningar gera hér á landi, smálán gegnum netið og farsíma, en starfsemi þessara fyrirtækja hefur legið undir gagnrýni fyrir að beina markaðssetningu sinni sérstaklega að ungmennum og veita lán á okurvöxtum.

Hinn 8. febrúar á þessu ári kallaði Árni Páll Árnason, núverandi efnahags- og viðskiptaráðherra og þáverandi félagsmálaráðherra, starfsemi þessara fyrirtækja „siðlausa sjóræningjastarfsemi“ í viðtali við fréttastofu Stöðvar 2.

Meðal hluthafa í Folkia er Bjarni Ármannsson, fyrrverandi forstjóri Glitnis, en félag hans Sjávarsýn ehf. fer með tíu prósenta hlut. Það eru fleiri Íslendingar í hluthafahópnum en Hörður Bender, sem er stofnandi fyrirtækisins, á 15 prósenta hlut, gegnum félag sitt Interactive. Þá á Engey Invest ehf. sem er í eigu feðganna Einars Sveinssonar og Benedikts Einarssonar, tíu prósenta hlut.

Nú í ágúst síðastliðnum var Folkia selt alþjóðlega fjármálafyrirtækinu Dollar Financial Corporation en kaupverðið var 28 milljónir dollara, jafnvirði rúmlega þriggja milljarða króna. Gera má ráð fyrir að Bjarni Ármannsson hafi fengið 300 milljónir króna í sinn hlut við söluna miðað við eignarhlut sinn.

Í þessu samhengi má benda á að annað dótturfélag Sjávarsýnar, Imagine Investment, komst að samkomulagi við skilanefnd Glitnis á síðasta ári um afskrift á 800 milljóna króna skuld þess við bankann.

Bjarni Ármannsson, vildi ekki tjá sig um málið í dag þegar fréttastofa náði tali af honum. Hann vildi ekki svara spurningum um hvort hann teldi eðlilegt að söluandvirðið á Folkia rynni upp í skuld Imagine Investment við þrotabú Glitnis, en eftir því sem fréttastofa kemst næst voru ekki fyrirvarar á samkomulagi sem Imagine gerði við skilanefnd Glitnis, þ.e ákvörðun um afskrift stendur.

Í þessu samhengi er sanngjarnt og eðlilegt að fram komi að Bjarni greiddi þrotabúi Glitnis samtals 1.020 milljónir króna á síðasta ári vegna endurgreiðslu á starfslokasamningi sem hann fékk þegar hann lét af störfum sem forstjóri, en það var hluti af heildaruppgjöri Bjarna við skilanefnd Glitnis.