Gunnar Rúnar játar

Gunnar Rúnar Sigurþórsson 23 ára gamall karlmaður úr Hafnarfirði hefur játað að hafa orðið Hannesi Þór Helgasyni að bana þann 15. ágúst síðastliðinn. Hann játaði fyrir lögreglu í gær og í dag að hafa orðið honum að bana. Hann var einn að verki. Málið telst upplýst.

Þetta kom fram á blaðamannafundi hjá Lögreglunni á höfuðborgarsvæðinu.

Kafarar leituðu í gær að morðvopninu í smábátahöfninni í Hafnarfirði. Leit stendur enn yfir á vopninu sem og öðrum gögnum og þá er einnig verið að ganga fjörur í Hafnarfirði. Gerð verður krafa um að geðheilbrigðisrannsókn á Gunnari Rúnari. En ekki er hægt að upplýsa að svo stöddu hver ástæða morðsins er.

Fyrr í dag var farið yfir málið hjá ríkissaksóknara, en hann hefur ákæruvald í alvarlegum málum. Honum var gerð grein fyrir því að málið teldist upplýst í grófum dráttum. Þó að málið teljist upplýst að mestu er enn verið að bíða eftir endanlegum niðurstöðum úr lífssýnum á vettvangi.

Gunnar var handtekinn fyrir viku síðan vegna rökstuddra grunsemda um að hann ætti aðild að morðinu á Hannesi Þór. Í kjölfarið var hann úrskurðaður í gæsluvarðhald. Viku áður var hann einnig handtekinn og gisti fangageymslu yfir nótt. Honum var síðan sleppt.

Ljóst þykir að morðið hafi verið framið einhvern tímann á bilinu milli 5 og 10 aðfaranótt sunnudagsins 15. ágúst. Von er á að ákæra verði gefin út á næstu vikum.