Fyrrverandi framkvæmdastjóri hjá Kaupþingi verst gjaldþroti

Gjaldþrot blasir við Bjarka Diego, fyrrverandi framkvæmdastjóra hjá Kaupþingi, nái úrskurður Ríkisskattstjóra um skattlagningu á söluréttasamningum af hlutabréfum í Kaupþingi fram að ganga. Samningana gerði Bjarki þegar að hann starfaði hjá bankanum. Hann hefur stefnt Ríkisskattstjóra vegna málsins og fer aðalmeðferð fram í málinu í dag.

Skattayfirvöld hafa krafist þess að samningar sem voru gerðir verði skattlagðir sem launatekjur en ekki sem fjármagnstekjur. Líta eigi á undirliggjandi ráðstafanir sem sölurétturinn tryggði sem kaupréttartekjur. Þessu hafnaði Bjarki algerlega fyrir dómi í morgun. Hann fullyrðir að samningar sem hann gerði á árunum 2001 og 2003 um kaup á hlutabréfum í Kaupþingi séu í grundvallaratriðum ólíkir kaupréttarsamningum. Máli sínu til stuðnings vísar hann meðal annars til þess að stjórnendur bankans hefðu ætlast til þess að bréfin yrðu í hans eigu á meðan að hann starfaði hjá bankanum.

Hreiðar Már Sigurðsson, fyrrverandi forstjóri Kaupþings, bar vitni í málinu í gegnum síma, en hann var staddur í Lúxemborg í morgun. Hreiðar var aðstoðarforstjóri Kaupþings til ársins 2003. Hreiðar tók undir orð Bjarka um að stjórnendur Kaupþings hefðu ekki ætlast til þess að hann, eða aðrir starfsmenn Kaupþings sem gerðu svipaða samninga og Bjarki árið 2001 og 2003, myndu selja bréfin.

Bjarki sagði fyrir dómi í morgun að næði úrskurður Ríkisskattstjóra, um endurákvörðun á skatti upp á 100 milljónir króna og ákvörðun slitastjórnar Kaupþings um riftun á niðurfellingu persónulegra ábyrgða vegna lána til stjórnenda og lykilstarfsmanna til hlutabréfakaupa í bankanum, fram að ganga yrði hann gjaldþrota. Enginn maður myndi ráða við þessar skuldbindingar.