Erlend staða þjóðarbúsins batnar um rúma 600 milljarða

Fjallað er um málið í Morgunkorni greiningar Íslandsbanka. Þar segir að í hlutfalli við landsframleiðslu síðasta árs var því hrein staða við útlönd neikvæð um 31% í marslok en ekki 72% eins og fyrri tölur gáfu til kynna.

Þetta kemur fram í nýjum tölum Seðlabankans sem hann birti í gær, en þar hefur bein fjárfesting erlendis verið leiðrétt fyrir oftöldum skuldum við tengda aðila í árslok 2009 og fjárinnstreymi vegna þess á síðasta fjórðungi ársins 2009. Rétt er að halda til haga að enn er um bráðabirgðatölur að ræða, en endanlegar tölur um beina fjárfestingu árið 2009 munu liggja fyrir í september næstkomandi.

Miðað við þessar tölur þá hefur hrein erlend staða við útlönd ekki verið betri síðan á síðasta fjórðungi ársins 2000. Þó verður að hafa í huga að þótt að kúfurinn af nettóskuldum gömlu bankanna þurrkist út stendur eftir meðal erlendra skulda sá hluti eigin fjár þeirra sem verður í eigu erlendra kröfuhafa eftir að slitameðferð þeirra lýkur. Við þetta má bæta að þessum tölum ber enn að taka með fyrirvara þar sem takmarkaðar upplýsingar eru um erlendar eignir og skuldir banka í slitameðferð og eru þá framreiknaðar eins og þær stóðu við þrot þeirra.

Eins og kunnugt er þá vega gömlu bankarnir þungt í þessum tölum en að þeim meðtöldum var erlend staða þjóðarbúsins við útlönd neikvæð um 5.273 ma.kr. í lok fyrsta ársfjórðungs 2010. Námu erlendar eignir 9.092 mö.kr. en skuldi 14.365 ma.kr.

Þessar leiðréttingar Seðlabankans hafa einnig nokkur áhrif á tölur um viðskiptajöfnuð fyrir síðustu misseri. Þannig mælist afgangur af viðskiptajöfnuði síðasta árs nú tæpir 32 milljarða kr. í stað 41 milljarð kr. áður, sé horft fram hjá hlut gömlu bankanna í þáttatekjum. Á þennan kvarða var hins vegar tæplega 5 milljarða kr. viðskiptahalli á 1. fjórðungi þessa árs, en fyrri tölur höfðu bent til 2,7 milljarða kr. halla.