Sverrir Hermannsson: Þetta var skelfilegt

Sverrir Hermannsson og félagar í HK áttu aldrei möguleika gegn Haukum er liðin mættust í undanúrslitum Eimskipsbikarsins í dag.

Liðið byrjaði leikinn skelfilega, mætti ekki tilbúið til leiks og það kostaði liðið sigurinn.

„Ég veit ekki hvað gerðist. Það var eitthvað andleysi í gangi. Þetta var bara skelfilegt. Ég bjóst við okkur miklu sterkari í þessum leik," sagði Sverrir svekktur.

„Ég veit ekki hvað skýrir þetta andleysi hjá okkur. Það er í það minnsta ljóst að við töpum öllum leikjum í deildinni ef við spilum svona illa. Það er mjög svekkjandi að hafa gefið þennan leik nánast frá okkur í upphafi."